Monako Qran-prisi çərçivəsində keçirilən RM Sotheby's hərracında Formula 1 bolidi satışa çıxarılıb. Bu bolidlə Mixael Şumaxer 2001-ci ildə məhz həmin yarışı qazanmışdı. Final qiyməti 15 980 000 avro olub — NY Timesın məlumatına görə, bu, Şumaxerin sükanı arxasında yarışdığı bir avtomobil üçün ödənilən ən yüksək məbləğdir.

Ferrari F2001 modelinin tarixi Monako Qran-prisi ilə sıx bağlıdır. Bu, Şumaxerin bir mövsümdə həm Monako yarışını, həm də çempionluğu qazandığı Ferrari tarixində yeganə boliddir. Eyni zamanda, bu maşınla o, Macarıstan Qran-prisində də qalib gələrək karyerasında dördüncü çempionluğunu təmin etmişdi. Nəhayət, bu, Şumaxerin Monakoda qazandığı sonuncu qələbə olmuş boliddir.

Hərrac təşkilatçıları bildiriblər ki, avtomobil bu il Ferrari mütəxəssislərinin iştirakı ilə tam texniki baxışdan keçirilib. Onu tam işlək vəziyyətə gətirmək üçün yalnız yeni yanacaq çənləri quraşdırmaq qalır — bu çənlər artıq indiki sahibi tərəfindən sifariş edilib və ödənilib.